Борот од дамнешни времиња се користи во народната медицина за лекување на дишните патишта, како и за лекување на кашлица и белодробни заболувања.

Лековитите својства на борот може да се користат во текот на целата година, а најдобро е шишарките да се соберат и употребат додека се млади и големи најмногу до 5 цм, бидејќи како што растат ги губат лековитите својства и стануваат дрвенести.

Додека се млади, шишарките се богати во витамин Ц кој за жал се губи со термичката обработка, но содржат и етерични масла, лековита смола и многу антиоксиданти кои се зачувуваат, а севкупното делување на организмот е алкално, што значи се намалува киселоста на организмот со редовна употреба.
Додека го приготвував сирупот, домот ми мирисаше како да се наоѓам во центарот на огромна борова шума.
Припремата е едноставна, оваа количина е за 1 неполна тегла сируп.

50тина млади шишарки
2 литри вода
900 г кафеав шеќер

Прво шишарките ставете ги во вода да преноќат. Следниот ден истурете ја водата, и ставете ги во чиста вода само да провријат.

Истурете ја таа вода, налејте ладна, додадете го шеќерот и оставете да се варат на тивка температура околу 4 часа додека не почне да се згуснува смесата и да се претвора во сируп. Мешајте повремено. Имајте во предвид да користите тенџере кое е нелепливо или некое старо тенџере кое нема да ви биде жал ако се уништи бидејќи се создава леплив слој на ѕидовите кој тешко се отстранува.
Процедете и складирајте го сирупот во стаклена тегла или шише и чувајте го во фрижидер.
При настинка или проблеми со кашлица, земајте по 1 лажица наутро.

Рецепт на Гордана Аџиева-Михајловска