Велчо Дојчиновски од Австралија по кусиот престој во родната Битола ќе замине на Куба каде што на претседателот Фидел Кастро ќе му ја врачи Книгата за познатиот револуционер Че Гевара.
Дојчиновски, како раководител на фирмата „Мејби”, во која се вработени и неговите партнери Ал Бигс и Стив Вајт, книгата ја објави во Мелбурн во тираж од 25.000 примероци од кои 15.000 на англиски, а 10.000 на шпански јазик. Во неа на 320 страници се поместени извадоци од дневникот на Че, писма, документи, интервјуа и фотографии низ кои се отсликува неговиот проблем и борба. Додека ја подготвувал книгата, тој се сретнал со ќерката на Гевара, Алеида, која била воодушевена од концепцијата на младите автори да го документираат ликот на нејзиниот татко. Книгата ја примила и вдовицата на Че Гевара, а неговиот син Камило во емаилот што го испратил до Дојчиновски вели дека книгата му оставила силен впечаток. Оваа книга на младиот битолчанец позитивно е оценета во Австралија, а дури и во мелбурншкиот весник „The age“ конкурираше за книга на неделата.
Од архивите на Петар Ставрев за Вечер 1981 г.
