Децата имаат сила да изберат здрав живот!
По три години посветена работа, здружението ЕКТЕР – Битола со гордост објавува дека нашата едукативна кампања „Кажи НЕ на пушењето“ годинава делуваше на национално ниво во основните и средните училишта низ цела Македонија.
Оваа година, по повод 31 Мај – Светскиот ден без тутун, ја испраќаме пораката гласно и јасно:
Секое дете има право и моќ да избере – и да каже НЕ на пушењето!
Пушењето не е само навика – тоа е предизвик кој ги допира најранливите, а особено младите. Затоа, преку нашата кампања, создаваме простор каде што учениците можат да зборуваат отворено, да прашуваат, да размислуваат – и да градат лична сила за донесување здрави одлуки.
Во текот на минатите години, над 1000 ученици од повеќе од 30 училишта низ земјата учествуваа во интерактивни работилници каде што учеа не само за штетноста на тутунот, туку и за моќта на самодовербата, критичкото мислење и градењето личен став.
За поддршка на овој процес, создадовме и „Прирачник за борба против пушењето“ – богат со активности, игри и алатки што помагаат децата да ја разберат суштината на изборот и да го зајакнат своето „НЕ“. Прирачникот е достапен и на албански и турски јазик, и ќе биде дистрибуиран низ сите училишта.
Кампањата „Кажи НЕ на пушењето“ е поддржана од Програмата за директна помош (DAP) на Амбасадата на Австралија во Белград, и таа поддршка ни овозможи да допреме до младите токму таму каде што е најпотребно – во училиштата, во училниците, во моментите кога се оформуваат нивните идентитети и вредности.
