Абдула Јусуфовски беше генерациски лидер и симбол на ракометниот Пелистер. Од игралиштата на отворено до најсилната југословенска лига, тој со години доминираше на позицијата десен бек. Физички моќен, интелигентен и тактички разновиден, важеше за кошмар на секоја одбрана и голман.
Со него во тимот, Пелистер првпат играше европски натпревари против Атлетико Мадрид, а подоцна ја предводеше екипата и во македонскиот шампионат. Остави белег и во Јафа Промет, каде настапуваше и како тренер, стигнувајќи до полуфинале на Купот на победници на купови.
Како тренер на РК Пелистер, во 1999 година ја освои шампионската титула, а потоа долгогодишното искуство го сподели и во Грција.
Ракометар како Абдула Јусуфовски се раѓа ретко, а неговото име останува трајно врежано во историјата на битолскиот и македонскиот ракомет.
