На 14 август 2025 година, фоајето на НУ Центар за култура Битола повторно се исполни со бои, светлина и приказни – со отворањето на тринаесеттото издание на фотографската изложба „Со љубов од Битола“. Оваа година, објективите беа насочени кон битолските порти – симболи на минатото и чувари на градската душа.
Изложбата е дел од годишната програма на НУ Центар за култура, финансиски поддржана од Министерството за култура и Општина Битола, во рамките на манифестацијата „Бит-Фест 2025“.
Претставени се вкупно 33 фотографии кои ја доловуваат магијата на битолските порти, од кои 30 се креации на учесниците на конкурсот. Секоја фотографија носи свој поглед, приказна и детал од неповторливиот шарм на градските порти. Стручното жири, во состав Димитар Чунговски, Кети Талевска Бакревска и Диоген Хаџи-Коста Милевски, внимателно ја направи селекцијата, а и самите тие учествуваа со по една своја фотографија, збогатувајќи ја изложбата со личен уметнички печат.
Првото место и признанието за највпечатлива фотографија оваа година му припадна на делото „Староградска порта“ од Марија Дојшовска – кадар што ја раскажува приказната на времето и сеќавањата. Второто место го освои Давид Козаров со фотографијата „216“, препознатлива по својата визуелна провокативност и мајсторска изведба. Третата награда замина кај Викторија Стојковска за „Вдахнување“ – фотографија која внесува тивка свежина и топлина. Покрај паричните награди, беа доделени и три пофалници за автори кои со својот објектив умешно ја доловија убавината и духот на битолските порти.
Изложбата за отворена ја прогласи директорот на НУ Центар за култура Битола, Сашо Илковски, кој истакна:
„’Со љубов од Битола’ не е само изложба – тоа е своевидна ризница на спомени и емоции, дигитална библиотека која ја чува и раскажува душата на нашиот град. Со ова докажуваме дека Битола, со својата историја, архитектура и дух, е непресушен извор на уметноста – инспирација за сите кои знаат да гледаат и чувствуваат.“
Во име на организаторот, присутните ги поздрави координаторот на проектот и член на жирито, Диоген Хаџи–Коста Милевски, кој нагласи дека изборот на најдобрите фотографии бил вистински предизвик, поради исклучителниот квалитет на сите пристигнати дела. Тој додаде дека ова издание, според бројот на учесници, испратени и изложени фотографии, го надминало секое претходно, поставувајќи нови рекорди и стандарди.
Портите на Битола се повеќе од влезови – тие се чувари на спомени, тивки раскажувачи на приказни и неми сведоци на минатото. Со секоја гребнатина, боја и форма, тие откриваат дел од душата на градот. Оваа изложба е патување низ тие порти – патување кон историјата, убавината и тајните што ги чуваат.
