Битола отсекогаш знаела да раѓа таленти, а едно од имињата што оставиле трага на музичката сцена е и Сашкa Петковска Липша.
Нејзината приказна започнува во 1970 година, кога на само 19 години го има својот прв јавен настап на фестивалот во Суботица, каде ја освојува првата награда за интерпретација. Веднаш потоа следува нов успех на фестивалот на млади пејачи во Порторож, каде го освојува второто место.
Овие успеси ја носат и на престижниот фестивал во Сан Ремо, каде настапува со композицијата „Еден пораз не е крај“ од Славе Димитров, потврдувајќи го својот талент и надвор од границите на поранешна Југославија.
Кариерата на Сашкa Петковска Липша продолжува со настапи на бројни југословенски фестивали, како и на меѓународни сцени. Освојува награди во Брашов и на „Златен Орфеј“ во Бугарија, а настапува и на концертни подиуми низ Европа.
Нејзиниот глас одекнува и преку телевизиските екрани, со настапи на австриската, полската и бугарската телевизија, а редовен учесник е и на фестивалот „Скопје“.
Во 1974 година, со песната „Бакни ме“ од Тодор Бојачиев, ја освојува втората награда од публиката, уште една потврда за нејзината популарност и квалитет.
Ова е уште една приказна од времето кога Битола создаваше уметници што не само што настапуваа, туку и оставаа белег.
Битола не се заборава. Таа се раскажува.
