Младиот битолски уметник Михаил Јовановски, кој има само 16 години и е ученик во СОУ Гимназија „Јосип Броз-Тито“ – Битола, пред битолската публика ќе ја претстави својата прва самостојна изложба, насловена „Симфонија на уметноста“.
Свеченото отворање е закажано за сабота, 12 септември, во 19:00 часот, во изложбениот салон на Друштвото на ликовни уметници Битола – ДЛУБ, во Малиот безистен.
Иако е на самиот почеток од својот уметнички пат, Јовановски преку изложбата отвора сериозна тема – опстанокот и вредноста на традиционалното сликарство во современото време.
Неговата порака е дека класичниот ликовен израз, автентичната четка и делото создадено од раката на уметникот имаат вредност која не згаснува. Преку својата „симфонија“ од бои, форми и емоции, младиот автор ја истакнува истрајноста на класичната уметност и нејзината способност да зборува со секоја нова генерација.
Особено радува фактот што зад оваа изложба стои 16-годишен битолчанец, кој уште во средношколските денови се охрабрува своите дела и својата визија да ги претстави самостојно пред јавноста.
„Симфонија на уметноста“ ќе може да се посети од 12 до 19 септември во салонот на ДЛУБ – Мал безистен.
📍 ДЛУБ – Мал безистен, Битола
📅 12 септември, сабота
🕖 Свечено отворање во 19:00 часот
Изложбата трае до 19 септември
Уште една млада битолска приказна која заслужува внимание и поддршка.
