Во просториите на Националната установа – Универзитетска библиотека „Св. Климент Охридски“ во Битола беше отворена изложбата „Прочитај ја љубовта – Поетски вкусови на љубовта и виното“, реализирана во соработка со учениците од графичката струка и нивните ментори од СОУ „Таки Даскало“ – Битола.
Изложбата претставува инспиративен спој на младешка креативност, поетска мисла и симболиката на виното како вечен мотив на љубовта и животната радост. Преку оригинални графички решенија, визуелни композиции и поетски изрази, учениците ја преточија љубовта во уметнички дела што зборуваат за нежноста, страста и убавината на човечките чувства.
Со оваа поставка, младите автори покажаа дека љубовта може да се „прочита“ не само низ стиховите, туку и преку боите, формите и симболите што ги создаваат. Виното, како метафора за радоста, зрелоста и споделувањето, доби нова уметничка димензија низ нивниот современ визуелен израз.
Изложбата е уште еден доказ дека уметноста и образованието, кога се поврзани, можат да создадат културен настан кој инспирира, обединува и остава трајна културна трага во градот.
По тој повод, директорката на Универзитетската библиотека, м-р Емилија Стефановска-Давкова, ја искористи оваа свечена прилика да ги израдува редовните читатели, доделувајќи им едногодишна бесплатна членарина – гест кој уште еднаш ја потврдува посветеноста на библиотеката кон културата, уметноста и читателската публика.
