ОУРЦ „Кочо Рацин“ – Битола го својот сензорен двор, создавајќи современо и пријатно катче наменето за поддршка на учениците со посебни образовни потреби.
Сензорниот двор претставува специјално уреден надворешен простор кој ги стимулира сетилата – допир, вид, слух и движење. Преку различни елементи како тактилни патеки, едукативни игри, реквизити за баланс и координација, децата имаат можност да учат и напредуваат преку игра, во безбедна и поттикнувачка средина.
Учениците со посебни образовни потреби се деца кои имаат потреба од дополнителна поддршка во образовниот процес. Тука спаѓаат деца со аутизам, интелектуални потешкотии, сензорни нарушувања (како проблеми со слух или вид), говорно-јазични тешкотии, како и деца со физички попречености. Секое дете има свои специфични способности и потреби, па затоа пристапот кон нивното образование е индивидуален и прилагоден.
Целта на ваквите сензорни простори е да се подобри концентрацијата, моториката, комуникацијата и социјалните вештини кај децата. Преку игра и интеракција, учениците полесно го изразуваат својот потенцијал и стекнуваат самодоверба.
Со обновата на сензорниот двор, ОУРЦ „Кочо Рацин“ уште еднаш ја потврдува својата посветеност кон создавање инклузивна средина, каде секое дете има можност да расте, учи и се развива според сопственото темпо.
Овој проект е значаен чекор напред во унапредување на условите за образование и грижа, испраќајќи силна порака дека различноста не е пречка, туку вредност која треба да се негува.
