Во фоајето на НУ Центар за култура Битола синоќа беше отворено 14. издание на изложбата на фотографии „Со Љубов од Битола“, проект на Центарот за европски развој и интеграција – ЦЕРИ Битола.
Годинашното издание се одржува под темата „Битола во златниот час“, посветена на препознатливата топла светлина пред зајдисонце и нејзиниот посебен визуелен печат врз градот.
На конкурсот учествуваа 19 фотографи со вкупно 100 фотографии. Стручното жири во состав Александар Јоначиќ, Горан Кузмановски и Диоген Хаџи-Коста Милевски избра 25 фотографии кои се претставени на изложбата.
Првата награда ја освои Давид Козаров, втората Викторија Стојковска, додека третата награда ѝ припадна на Татјана Димитриевска. Наталија Василевска доби пофалница за посебна мајсторија.
Наградите ги врачија претставници на организаторите, институциите и поддржувачите на проектот, кои ја истакнаа важноста на фотографијата како начин за зачувување на моментите, атмосферата и препознатливиот лик на Битола.
Проектот е финансиски поддржан од Министерството за култура и туризам, а се реализира во партнерство со НУ Центар за култура Битола. Изложбата е дел и од Битолското културно лето „Бит Фест 2026“, со поддршка од КИЦ Битола, Општина Битола и Опфолио Инвестиции.
Изложбата „Со Љубов од Битола“ ќе биде отворена за посетители до 27 август 2026 година, секој ден освен недела, во работното време на НУ Центар за култура Битола.
