Изградбата на планинарскиот дом „Копанки“ на Пелистер влегува во завршна фаза, беше истакнато на координативниот состанок одржан во кабинетот на градоначалникот на Општина Битола, Тони Коњановски.
На состанокот, покрај градоначалникот и секретарот на Општината, Борче Димитровски, присуствуваа и претседателот на Планинарско-спортскиот клуб „Пелистер“, Диме Попов, Гоце Стојаноски – директор на фирмата изведувач „Стентон градба“, ангажирана од ПСК „Пелистер“, како и директорот на ЕСМ Молика, Горан Исков.
Како што беше посочено, околу 90 проценти од бетонско-армирачките работи и кровната конструкција се веќе завршени. Во наредниот период останува реализација на дел од фазите поврзани со архитектурата, како и инсталациите за водовод, канализација и електрика. Планот е изградбата на домот целосно да заврши до октомври оваа година, додека опремувањето на хотелскиот дел – собите и внатрешниот инвентар – е предвидено да се реализира во текот на 2027 година.
Од Планинарско-спортскиот клуб „Пелистер“ беше нагласено дека домот „Копанки“ претставува исклучително значаен проект за клубот, но и за сите љубители на планината, планинарството и зимските спортови, како симбол на обновата и развојот на планинската инфраструктура на Пелистер.
На состанокот беше истакната и улогата на ЕСМ Молика, која годинава го промовираше ноќното осветлување на скијачките терени и континуирано работи на осовременување на ски-инфраструктурата на Копанки, во тесна соработка со ПСК „Пелистер“ и Општина Битола.
