Просториите на здружението за развој на ромската заедница „Сумнал“ – Битола деновиве беа исполнети со детска смеа, блескави очи и вистинска празнична атмосфера. Во пресрет на новогодишните празници, беа поделени новогодишни пакетчиња за децата – корисници на здружението, кои со искрена радост и возбуда ги прифатија подароците, без да бараат мани или да гледаат што има внатре.
Настанот донесе топлина, внимание и чувство на заедништво, потсетувајќи дека токму ваквите моменти најдолго се паметат. Посебна возбуда предизвика пристигнувањето на Дедо Мраз, кој во легендарното фичо донесе вистинска празнична магија, заедно со Зоран Ѓорѓиев, претворајќи го денот во незаборавна приказна за најмладите.
Новогодишните пакетчиња беа обезбедени благодарение на хуманоста и поддршката од Иле Михајловски, кој уште еднаш покажа дека празниците се најубави кога се споделуваат со срце и искрена желба да се израдуваат оние на кои тоа најмногу им значи.
Емоциите, насмевките и искрената детска радост низ својот објектив мајсторски ги овековечи фотографката Ивона Кочов, чии фотографии сведочат за моментите што зборуваат повеќе од илјада зборови.
Овој настан уште еднаш потсети дека радоста е најубавиот подарок и дека празничната магија живее токму во малите, но искрени гестови кои оставаат трајна трага во срцата на децата.
