Еурофарм Пелистер продолжува да го гради тимот врз темели на стабилност, квалитет и препознатливи вредности. Клубот официјално потврди дека најдобриот македонски голман, Никола Митревски, ќе го продолжи својот престој во Битола, потпишувајќи нов договор за сезоната 2026/27, со опција за продолжување и во сезоната 2027/28.
Во време кога резултатите често се ставаат во прв план, од таборот на Пелистер јасно порачуваат дека вредностите се тие што го прават клубот посебен. Токму затоа, задржувањето на Митревски претставува повеќе од обичен трансфер потег – тоа е потврда за континуитет, доверба и заедничка визија.
Митревски е дете на клубот и голман кој низ годините израсна во вистински лидер, како на теренот, така и надвор од него. Со повеќе од две децении активно играње на врвно ниво, зад себе има богата кариера исполнета со трофеи и значајни настапи, но, како што велат од клубот, најголемо задоволство е кога успесите се слават дома – во Битола.
Покрај клупските обврски, Митревски е и еден од столбовите на македонската репрезентација, симбол на сигурност и искуство меѓу стативите. Неговото присуство во тимот значи стабилност, но и инспирација за помладите генерации кои доаѓаат.
Во својата кариера настапуваше за повеќе реномирани клубови, меѓу кои Вардар, Металург, Констанца, Бенфика и Порто, но враќањето во матичниот клуб и продолжувањето на соработката со Пелистер носи посебна тежина.
Со овој потег, Еурофарм Пелистер испраќа јасна порака дека иднината ќе се гради со свои луѓе, со играчи кои го разбираат значењето на дресот и кои знаат што значи да се игра за Битола.
