Галоп Битолска Коњаница, заедно со Уникат Бенд, успешно ја претставија македонската традиција, историја и музичка култура на културен настан одржан во Нирнберг, Германија. Настанот беше реализиран во рамки на меѓународна културна соработка и привлече голем број посетители, меѓу кои македонската дијаспора, како и љубители на балканската култура.
Со своето автентично појавување, впечатливи историски костими и силната симболика на коњаницата, Галоп Битолска Коњаница испрати јасна порака за богатото македонско културно наследство и слободарската традиција. Настапот беше дополнет со енергичната и емотивна изведба на Уникат Бенд, кои преку македонска изворна и современа музика создадоа незаборавна атмосфера и силна врска со публиката.
Гостувањето во Нирнберг претставува уште еден значаен чекор во мисијата на Галоп Битолска Коњаница за меѓународна промоција на Македонија, нејзината историја и културен идентитет, како и за поддршка на македонските уметници и музичари надвор од границите на државата.
Организаторите и присутните ја истакнаа важноста на ваквите настани, кои имаат клучна улога во зачувувањето на националниот идентитет кај дијаспората и во зајакнувањето на културните врски меѓу Македонија и Германија.
Галоп Битолска Коњаница и Уникат Бенд најавуваат продолжување на ваквите културни гостувања и во други европски градови, со цел македонската традиција, историја и уметност да добијат уште поголема меѓународна видливост.
На крајот, Галоп Битолска Коњаница упати искрена благодарност до организаторите и поддржувачите на настанот:
МПЦО „Св. Атанасиј“ – Нирнберг, Гоце Стојчески, Дејан Кржовски и МКСД „Вардар“ – Нирнберг, за нивната поддршка и придонес во реализацијата на ова значајно културно гостување.
