Битола некогаш се гордееше со својата индустрија, а меѓу препознатливите имиња беше и „КИБ“, Керамидна индустрија Битола. Фабрика која произведуваше блокови, тули и материјали што ги вградуваа темелите на илјадници домови низ градот и пошироко.
Според архивските податоци, „КИБ“ вршел производство на сите видови градежни блокови и тули, како и елементи за тавански конструкции. Со сопствен транспорт, производите се доставувале директно до потрошувачите, што ја правело оваа фабрика целосно заокружен индустриски систем.
Во времето кога Битола се ширеше и се градеа нови населби, „КИБ“ беше дел од секојдневието, тивок, но клучен двигател на урбаниот развој.
Денес, сликата е поинаква.
Керамидницата не работи.
Објектите што некогаш беа полни со живот, работници и машини, сега стојат напуштени и сведочат за едно поинакво време. Судбината на „КИБ“ е слична на многу други индустриски капацитети кои не ја преживеаја транзицијата.
И покрај тоа, споменот останува.
Во секоја стара куќа изградена со тие тули, во секоја улица што се ширела со нив.
Битола памети.
