Младата битолска пингпонгарка Калина Митева продолжува со одличните настапи на меѓународната сцена. На турнирот што денес се одржа во Лерин, Грција, таа по вторпат го освои првото место и победничкиот пехар во категоријата девојчиња до 11 години, совладувајќи ги убедливо сите свои противнички.
Одличен настап имаше и Кристијан Митев, кој се пласираше меѓу осумте најдобри во категоријата момчиња до 15 години. По голема и неизвесна борба беше поразен од грчкиот репрезентативец, актуелен балкански шампион.
Солиден настап забележа и Марко Макаријоски. Иако не успеа да избори пласман во борбата за медал, тој остави добар впечаток, а настапот на силен меѓународен турнир претставува значајно искуство и дополнителен мотив за неговиот понатамошен развој.
Натпреварувањата продолжуваат и утре, кога македонските претставници ќе настапат и во останатите категории.
