БИТОЛА – Македонскиот шампион продолжува да инвестира во иднината. РК Еурофарм Пелистер го обезбеди потписот на еден од најталентираните млади хрватски ракометари, 18-годишниот Диего Басанесе, кој во Битола пристигнува со репутација на голем потенцијал и светла иднина.
Младиот десен бек, кој е стандарден член на кадетската и младинската репрезентација на Хрватска, потпиша четиригодишен договор со битолскиот клуб и ќе биде дел од проектот на Еурофарм Пелистер за наредните сезони.
Пред трансферот во Битола, Басанесе успешно настапуваше за хрватскиот Умаг, каде со своите игри го привлече вниманието на ракометната јавност. Со националниот тим на Хрватска забележа значаен успех на Медитеранските игри, од каде се врати со освоен медал, потврдувајќи го својот квалитет и потенцијал.
Од Еурофарм Пелистер информираат дека новото засилување официјално ќе биде претставено пред јавноста на почетокот на подготовките за сезоната 2026/27.
Со ангажманот на Диего Басанесе, битолскиот клуб уште еднаш испраќа јасна порака дека покрај резултатите во сегашноста, сериозно ја гради и својата иднина, препознавајќи и развивајќи млади играчи кои допрва треба да го достигнат својот врв.
