Во старите фотографии од Битола често се крие по некоја приказна што вреди повторно да се раскаже. Една од нив е приказната за вокално инструменталната група Гром, состав кој се појавува на битолската музичка сцена во доцните 1970 ти години и остава свој белег во тогашната младинска рок и поп култура.
Групата Гром е формирана во Битола во 1977 година. Веќе следната година го привлекува вниманието на музичката јавност. На Гитаријадата во Охрид го освојуваат првото место, а на поп фестивалот во Бела Паланка добиваат трета награда од стручното жири, трета награда од публиката и награда за најдобра фолклорно обработена композиција.
Во составот на групата тогаш биле Сотир Спасевски како вокал, Раде Стаматов на соло гитара, Љупчо Дамевски на клавијатури, Тони Стаматаов на бас гитара и Митко Ѓурковски на тапани.
Оваа фотографија денес претставува мал временски прозорец кон едно поинакво време кога младите бендови ја создаваа својата музичка приказна со многу ентузијазам и љубов кон сцената. Но приказната за Гром не останала само во спомените. Бендот и денес е присутен, продолжувајќи да го носи истиот дух и страст кон музиката, како жив доказ дека вистинската музика не старее.
Фото ВБУ Воскресение 2025
