По првиот ден од Новата година без породувања, вториот јануарски ден во 2026 година донесе радосни вести од Болница „Плодност“, каде на свет дојдоа осум новороденчиња.
Родени се четири машки и четири женски бебиња, а меѓу нив и предвремено родени близнаци – машко и женско од Прилеп. Како што информираат од болницата, близнаците се во стабилна состојба и под постојана, внимателна грижа на медицинскиот тим.
Според местото на живеење на родилките, пет од новороденчињата се од Прилеп, а по едно бебе од Ресен, Битола и Росоман.
Во текот на 2025 година, во Болница „Плодност“ се родиле вкупно 749 бебиња, што претставува намалување од околу 50 новороденчиња во споредба со претходната година. Од болницата посочуваат дека и оваа бројка го следи општиот национален тренд на пад на наталитетот во Македонија.
И покрај статистиките, почетокот на новата година со осум нови животи носи надеж и потсетува на значењето на секое новороденче за иднината на заедницата.
