Во животот често се случува во една година да се совпаднат повеќе јубилеи, моменти кои тивко се враќаат од минатото и нè потсетуваат колку време поминало. Токму таква е и 2026 година за битолчанецот Лазо Лазаровски, кој се навраќа на спомените од далечната 1971 година, период исполнет со младост, радост и нови почетоци.
Таа година го одбележува полагањето на матурскиот испит во Богословијата, но и едно незаборавно лето поминато со другарите на Преспанското Езеро. Претор во тоа време бил вистинско одморалиште, место каде се среќавале млади, студенти, деца и работници, создавајќи жива и разиграна атмосфера.
Летото било исполнето со забава, музика и дружење. Настапувале познати пејачи од тогашна Југославија, се одржувала познатата „Преторска свадба“, а ноќните капења во езерото биле дел од магијата што го правела тоа време посебно. Денес, како што сведочи Лазаровски, од тој дух останала само бледа слика, спомен на едно поубаво време.
По летото, доаѓа есента и новото поглавје, студентскиот живот во Белград. Во тие години, Белград бил една од најпосакуваните дестинации за студирање, град што нудел богата културна сцена, универзитети, фестивали, театарски претстави во „Ателје 212“ и Народното позориште, како и незаменливата боемска атмосфера на Скадарлија.
Студентскиот живот, како што раскажува, бил вистинско доживување, слобода, самостојност и можност сами да го креираат своето секојдневие, за разлика од строго организираното средно образование.
Денес, 55 години подоцна, сите тие моменти се дел од едно богато животно патување. Јубилеите што се навршуваат не се само бројки, туку потсетник дека спомените остануваат засекогаш.
„Всушност, целиот наш живот е еден најубав сон што постојано го сонуваме“, вели битолчанецот Лазаровски.
