Битола повторно има причина за спортска гордост! Битолчанецот Ален Рустемовски блесна на престижниот меѓународен боксерски турнир „Гранд при Загреб“ – Меморијал „Јосип Јовиќ“, кој се одржа во Хрватска, освојувајќи златен медал, Гран при на турнирот, но и престижното признание за најдобар боксер на турнирот.
На силниот турнир настапиле боксери од осум држави: Македонија, Хрватска, Босна и Херцеговина, Словенија, Косово, Унгарија, Италија и Германија. Ален до финалето стигнал со убедливи настапи, а во полуфиналето славел со прекин во третата рунда против противник од Словенија. Во големото финале се соочил со домашен боксер од Хрватска и уште еднаш покажал класа за да се закити со најсјајното одличје.
Како круна на извонредниот настап, Рустемовски бил прогласен и за најдобар боксер на целиот турнир, уште една потврда за неговиот талент, посветеност и голем потенцијал во рингот.
Браво Ален, Битола се гордее!
