Битолчанецот Петар Георгиев Калица, нашиот плоден македонски текстописец и композитор, ја промовира својата најнова песна со наслов „Балада за Манди и Тохари“, која од денес е достапна на платформата Јутуб. Со ова музичко дело, Калица им оддава почит на двајца автентични урбани ликови од старата Битола, Манди и Тохари, неразделни другари, запаметени во колективната меморија на градот.
Инспирирана од битолскиот урбан фолклор и приказните што со години се прераскажуваат меѓу генерациите, песната носи силна емоционална и носталгична порака. Манди и Тохари, едниот изразито висок, другиот низок, претставуваат симбол на едно минато време, на човечноста, другарството и специфичниот дух на некогашната Битола.
Преку музика и текст, Калица успева да ја преточи таа градска меморија во современ израз, спојувајќи ја уметноста со локалната историја. „Балада за Манди и Тохари“ не е само песна, туку музичка разгледница од старата Битола, наменета и за оние што ги паметат овие ликови, но и за помладите генерации кои преку вакви дела ја запознаваат душата на градот.
Новата песна на Калица е уште еден доказ дека битолските приказни продолжуваат да живеат, овојпат низ музика и дека урбаните легенди сè уште имаат што да кажат во современиот културен контекст.
