Во време кога младите најчесто ги гледаме на спортски терени, музички сцени или во светот на технологијата, Битола има уште една причина за гордост. Тоа е Искра Нечаковска, 18-годишна ученичка во СОУ Гимназија „Јосип Броз Тито“ – Битола, која со своето знаење, труд и посветеност веќе неколку години е меѓу најуспешните млади физичари во Македонија.
Нејзината научна приказна започнува уште во прва година средно образование. Во 2022 година, на само 15 години, Искра освои бронзен медал на Меѓународната јуниорска олимпијада по природни науки во Богота, Колумбија, каде достојно ја претставуваше Македонија меѓу најдобрите млади научници од светот.
Во 2024 година следуваше нов голем успех – сребрен медал на Балканската олимпијада по физика во Никшиќ, Црна Гора, каде освои и специјална награда за целосно решена задача.
Во 2025 година, како 17-годишна гимназијалка, Искра освои бронзен медал на 55. Меѓународна олимпијада по физика во Париз, Франција – едно од најпрестижните натпреварувања за млади физичари во светот.
Круна на досегашните успеси е сребрениот медал освоен во 2026 година на Европската олимпијада по физика во Гетеборг, Шведска, каде уште еднаш покажа дека знаењето, упорноста и талентот немаат граници.
Зад сите овие успеси стојат години посветена работа, безброј часови учење и подготовки, како и поддршката од нејзиното семејство, училиштето и менторката, професорката по физика Драга Мишиќ.
Приказната на Искра Нечаковска е доказ дека Битола не создава само врвни спортисти, уметници и културни работници, туку и научници кои ја претставуваат Македонија на највисоко светско ниво.
На само 18 години, Искра веќе испишува страници со кои ќе се гордеат генерации битолчани.
Браво Искра! Битола се гордее со тебе.
