Битола повторно се најде на мапата на Европа, откако реномираниот светски медиум Time Out ја вклучи на листата на најпотценети туристички дестинации за 2026 година.
Според нив, Македонија и понатаму е „дивo потценета“, а вниманието на туристите најчесто оди кон Охрид и Скопје. Но, токму тука доаѓа Битола, град кој нуди нешто поразлично.
За Битола тие пишуваат дека е еден од најубавите градови во регионот, со извонредна архитектура, силно историско наследство и атмосфера која се чувствува на секој чекор.
Градот е познат како „град на конзулите“, место каде историјата „светка на секој агол“, опкружен со планини и богата културна традиција.
Дополнително, препораката е јасна – секој што ќе ја посети Битола, задолжително да направи излет и до Пелистер, првиот национален парк во поранешна Југославија.
Кои други градови се на листата?
Покрај Битола, на листата на Time Out се најдоа и други интересни, но помалку туристички експонирани европски дестинации:
- Дери, Северна Ирска – историски град со силна културна сцена
- Гент, Белгија – романтичен град со канали и фестивали
- (во пошироки анализи и препораки се споменуваат и) Пловдив во Бугарија, Улцињ во Црна Гора и други „скриени бисери“ на Балканот и Европа.
Ова признание е уште една потврда дека Битола полека, но сигурно, излегува од сенката и станува дестинација која странците ја откриваат како автентична, културна и поинаква од масовниот туризам.
Град со душа и историја, Битола, како што изгледа, конечно го добива вниманието што одамна го заслужува.
