Уште еден голем спортски успех доаѓа од Битола. Мотокрос возачот Антонио Дамјановски по седми пат во својата кариера ја освои шампионската титула, овојпат со прво место во класата MX2 за 2025 година.
Со сигурни возења, зрелост на патеката и препознатлива борбеност, Дамјановски уште еднаш покажа зошто со години е меѓу најдобрите во македонскиот мотокрос. Седмата титула не е случајност, туку резултат на континуирана работа, дисциплина и силна спортска визија.
По освојувањето на титулата, Антонио упати искрена благодарност до сите кои го поддржуваат и го следат на неговиот пат кон успехот, нагласувајќи дека поддршката од навивачите, семејството и тимот е клучна за секој постигнат резултат.
Битола со право се гордее со своите шампиони. Успесите на Антонио Дамјановски се уште една потврда дека градот под Пелистер има силна мотокрос традиција и спортисти кои оставаат трага, од сезона во сезона.
