Македонскиот боксер Ален Рустемовски го заврши својот настап на Европското првенство со бронзен медал, по три победи во исклучително тешки мечеви и пораз во полуфиналето од украинскиот претставник со 4:1 на поени.
Но зад бронзата стои приказна многу поголема од еден спортски резултат.
„Целиот мој живот се борев за овој момент. Освојување сениорски европски медал беше еден од моите најголеми соништа“, порача Рустемовски по завршувањето на настапот.
Неговиот пат до европскиот подиум не бил лесен. Години тренинзи, жртви, ограничена финансиска поддршка, подготовки и кампови без тренер, па дури и заминувања на турнири и натпревари сам.
Сепак – не се откажал.
„Желбата за успех ми беше преголема. Знаев дека еден ден ќе успеам. Денес можам да кажам дека ова е само почеток.“
Посебна тежина има фактот што, според Рустемовски, со овој успех по 20 години повторно е донесен европски медал во бокс за Македонија.
А неговите амбиции не завршуваат со европската бронза.
„Мојот сон останува ист – Олимпијада, олимписки медал и еден ден да освојам сè што може да се освои.“
Ален нагласи дека медалот им го посветува и на сите луѓе кои останале покрај него, го поддржувале и верувале во него во најтешките моменти.
Од европскиот ринг се враќа со бронза околу вратот, но и со порака дека патот продолжува.
Ова е само почеток.
